„საქართველოში 50 400 ბავშვს არ აქვს ინტერნეტთან წვდომა და ელექტრონული მოწყობილობები“
07-05-2021
დაკოპირებულია
-
+
საქართველოში 50 400 ბავშვს არ აქვს ინტერნეტთან წვდომა და ელექტრონული მოწყობილობები განათლების მისაღებად, ამის შესახებ „იუნისეფი საქართველოს“ კომუნიკაციის პროგრამის ხელმძღვანელმა, მაია ქურციკიძემ განაცხადა.
„ჩვენ ყველაფერი უნდა გავაკეთოთ იმისთვის, რომ თავიდან ავიცილოთ კოვიდის დაკარგული თაობა. ჩვენ ამ პერიოდის განმავლობაში დავკარგეთ ახალგაზრდების მთელი პოტენციალი. ძალიან ბევრ მათგანს არ ჰქონდა საშუალება, განათლება მიეღო, დისტანციურ განათლებაში ჩართულიყო და ასევე, მათთვის შეფერხდა მთელი რიგი მომსახურებების მიწოდება.
საქართველოში არის 50 400 ბავშვი, ვისაც არ აქვს ინტერნეტთან წვდომა და ელექტრონული მოწყობილობები განათლების მისაღებად. როცა 21-ე საუკუნის განათლებაზე ვსაუბრობთ, შეუძლებელია, ინტერნეტთან ხელმისაწვდომობის გარეშე ვილაპარაკოთ ნორმალურ, ხარისხიან განათლებაზე. ეს პანდემიის გარეშეც აუცილებელია ბავშვისთვის, რომ მან 21-ე საუკუნის კომპეტენციები შეიძინოს, მაგრამ სამწუხაროდ, დღეს, საქართველოში გვყავს ბავშვები, რომლებსაც ინტერნეტთან წვდომა არ აქვთ. ამ პანდემიის პერიოდში ბევრს ვმოგზაურობდი, ბევრ რეგიონში ვიყავი და ვნახე ოჯახი, სადაც ერთი მობილური ტელეფონი ჰქონდათ, ოჯახში კი შვიდი ბავშვი იყო და ყველა ამ ერთი მობილური ტელეფონით სარგებლობდა. მოგეხსენებათ, ასეთ პირობებში განათლების ხარისხი ვერანაირად ვერ იქნებოდა დამაკმაყოფილებელი“, – განაცხადა ქურციკიძემ.