რას ურჩევდა აბიტურიენტებს, რამდენად მნიშვნელოვნად მიაჩნია სახელმძღვანელოების გრიფირების პროცესში საზოგადოების ჩართულობა, როგორ აფასებს ელექტრონული ჟურნალის წარმოების სავალდებულო დანერგვას  - ამ და სხვა საკითხებზე etaloni.ge ქალაქ თბილისის N107 საჯარო სკოლის დირექტორის, მარინე დემეტრაშვილის მოსაზრებებს გთავაზობთ:

- როგორ აფასებთ ინიციატივას ეროვნულ გამოცდებთან დაკავშირებით, რომ შესაძლოა უნივერსიტეტში ჩარიცხვისას ეროვნული გამოცდების ქულასთან ერთად, გათვალისწინებული იყოს: სკოლის საშუალო ნიშანი, რეკომენდაციები მასწავლებლებისგან თუ კლასგარეშე მუშაობა?

- მე ამ ინიციატივას პოზიტიურად ვაფასებ.  საზოგადოების თვალში გაძლიერდება სკოლის ავტორიტეტი. 

- რას ურჩევდით აბიტურიენტებს? რას მიაქციონ ყურადღება მომავალი პროფესიის არჩევისას და როგორ გამოიყენონ გამოცდებამდე დარჩენილი პერიოდი უფრო ნაყოფიერად?

- მომავალი პროფესიის არჩევისას პირველ რიგში გაითვალისწინონ საკუთარი ინტერესები, ნიჭი და უნარები. ყურადღება მიაქციონ იმასაც შრომის ბაზარზე რამდენად მოთხოვნადია ესა თუ ის პროფესია. ზოგ შემთხვევაში ახლობელი ადამიანების რჩევებიც მისაღებია. ვურჩევდი გაუფრთხილდნენ თითოეულ წუთს,  მთელი ენერგია და ძალისხმევა მიმართონ ცოდნის უკეთ დაუფლებისკენ.

- რამდენად მნიშვნელოვნად მიგაჩნიათ სახელმძღვანელოების გრიფირების პროცესში საზოგადოების ჩართულობა და რამდენად უნდა იყოს გათვალისწინებული საზოგადოების აზრი საექსპერტო კომისიების მიერ?

- ვფიქრობ, ეს დიდი დროის და ენერგიის ხარჯვას გამოიწვევს. ყველას აზრიც ვერ იქნება გათვალისწინებული. თან ჩვენ ვიცით, რომ სახელმძღვანელო არის ერთ-ერთი რესურსი სწავლა-სწავლების პროცესში და არა ერთადერთი.

- როგორ შეაფასებდით ელექტრონული ჟურნალის წარმოების სავალდებულო დანერგვას? რამდენად მარტივად ახერხებენ მასში მასწავლებლები მუშაობას და რამდენად ხშირად საჭიროებენ დახმარებას აღნიშნულ პროცესში?

- ვფიქრობ, ყველა მიეჩვია ელექტრონული ჟურნალის წარმოებას და ეს პრობლემას აღარ ქმნის პირადად ჩემს სკოლაში.

- რას ეტყოდით და როგორ გაამხნევებდით კოლეგა დირექტორებს, რომელთაც ამ რთულ ეპიდპირობებში გიწევთ სკოლის მართვა და მუდმივი ზრუნვა ონლაინ თუ დასწრებით გამართული სასწავლო პროცესის უზრუნველსაყოფად?

 - ყველაფერი გაივლის  და ყველაფერი იქნება კარგად, კოლეგებო. მალე დავუბრუნდებით სწავლების ჩვეულ რეჟიმს.