გიორგი კვირიკაშვილმა ბიზნესის წარმომადგენლებს მიმართა, რომ მაქსიმალურად გამოიყენონ ეკონომიკაში არსებული ზრდის დინამიკა და შესაძლებლობები
13.10.2017

საქართველოს პრემიერ-მინისტრმა, გიორგი კვირიკაშვილმა მიმართა ბიზნესის წარმომადგენლებს, მაქსიმალურად გამოიყენონ სამშენებლო სფეროში, ზოგადად ეკონომიკაში არსებული ზრდის დინამიკა და შესაძლებლობები.

მთავრობის მეთაურმა ბეტონის ფილების მწარმოებელი ახალი საწარმოს გახნისაზე სიტყვით გამოსვლისას მშენებლობის სექტორში არსებულ ზრდაზე გაამახვილა ყურადღება და აღნიშნა, რომ მთლიანად ეკონომიკაში არსებული დინამიკა ძალიან სახარბიელოა.

„2016 წლის მაჩვენებელთან შედარებით, 2017 წლის ბოლოს ჩვენ დავასრულებთ 36%-იანი ზრდით მხოლოდ ინფრასტრუქტურის ნაწილში, ხოლო 2018 წელი, 2016 წლის ბაზასთან შედარებით არის 89%-იანი ზრდა, ანუ ინფრასტრუქტურის ხარჯების თითქმის გაორმაგება. მილიარდ 830 მილიონი ლარის ხარჯი არის ჩადებული 2018 წლის ბიუჯეტში მხოლოდ ინფრასტრუქტურის მიმართულებით, მარტო სახელმწიფოს მხრიდან. ამას უკვე დაემატება კერძო სექტორის მზარდი დინამიკა და, ანალიზის შედეგად, რომლის ნახვაც ყველა თქვენგანს შეუძლია, ზრდაში ყველაზე დიდი წვლილი დღეს კერძო სექტორს ეკუთვნის. ანუ, ეს ზრდა მხოლოდ სახელმწიფოს მხრიდან მოტანილი არ არის.

აქედან გამომდინარე, 89%-იანი ზრდა შარშანდელ მონაცემებთან შედარებით, გაცილებით დიდ ეფექტს მოიტანს კერძო სექტორის მხრიდან ინვესტიციების კუთხით. თუ ამას დავამატებთ იმასაც, რომ ძალიან მნიშვნელოვანი ჰიდროელექტროსადგურები შენდება, ასევე დასრულდა ანაკლიის პორტთან დაკავშირებული იურიდიული პროცესი, ფინანსურ ინსტიტუტებთან საქმე თითქმის ბოლომდეა მისული და დეკემბერში მშენებლობა დაიწყება, ეს კიდევ უფრო დიდ დინამიკას მოიტანს. შესაბამისად, ასეთი ტიპის საწარმოების პროდუქციაზე იქნება გაცილებით უფრო დიდი მოთხოვნა", - განაცხადა პრემიერმა.

გიორგი კვირიკაშვილმა ყველა ბიზნესმენს მოუწოდა, მაქსიმალურად გამოიყენონ ეს დინამიკა და შესაძლებლობები, რომელიც მათ მისცემს საშუალებას, გაზარდონ მასშტაბები, შემოიტანონ წამყვანი კომპანიების დანადგარები, როგორი იტალიური დანადგარებიც აქვს "მეგაპროდაქშენს", რაც ძალიან დიდ უკუგებას მოიტანს, პირველ რიგში, კერძო სექტორში არსებული ზრდიდან და სახელმწიფოს მხრიდან ინვესტიციების მიმართულებით გაზრდილი დანახარჯებიდან გამომდინარე.



კომენტარები


სხვა სიახლეები
სამ, 24 ოქტომბერი 2017
10:00